Mayın 17-də Xocalı rayon İcra Hakimiyyəti yanında fəaliyyət göstərən Narkomanlığa və
Narkotik Vasitələrin Qanunsuz Dövriyyəsinə Qarşı Mübarizə üzrə Komissiyanın təşkilatçılığı
ilə Xocalı rayon 1 saylı tam orta məktəbdə maarifləndirici tədbir keçirildi. Tədbirdə
Xocalı rayon İcra Hakimiyyəti başçısının müavini, Narkomanlığa və Narkotik
Vasitələrin Qanunsuz Dövriyyəsinə Qarşı Mübarizə üzrə Komissiyanın sədri Lamiyyə
Qarayeva, rayon icra hakimiyyəti aparatında Yetkinlik yaşına çatmayanların işləri
və hüquqlarının müdafiəsi üzrə komissiyanın məsul katibi Xəlil Vəliyev, Xocalı
RPŞ-nin Yetkinlik yaşına çatmayanların işləri üzrə inspektoru Tural Xəlilov, Xocalı şəhər 1 saylı tam orta məktəbin direktoru Nəvai Həsənov, məktəbin pedaqoji kollektivi, IX, X, XI sinif şagirdləri və valideynlər iştirak etdilər.  Tədbirdə çıxış edən Lamiyə Qarayeva narkomaniya ilə mübarizədə
valideynlərlə övladları arasında düzgün münasibətin qurulması mövzusunda fikirlərini
bölüşdü. Qeyd etdi ki, narkomaniyanın profilaktikası ailə və məktəbdən
başlanmalıdır. Valideynlərin uşaqlarının narkomaniyadan qorunmasında bu
profilaktikanın rolunu başa düşmələri olduqca mühümdür. Araşdırmalara əsasən,
narkotik maddələrdən istifadə ən çox yeniyetməlik dövründə başlayır.
Psixoloqlar bunu belə izah edirlər ki, fiziki və zehni sahədə əhəmiyyətli dəyişikliklərin
yaşandığı, sürətli böyümə dövrü olaraq xarakterizə edilən yeniyetməliyin ən əhəmiyyətli
psixososial xüsusiyyəti şəxsiyyətin mənimsənilməsidir. Tədricən müstəqil olmağa
başlayan yeniyetmə üçün bu dövrdə dostluq münasibətləri böyük əhəmiyyət kəsb
edir və o, dostlar qrupuna daxil olanda onların təsiri altına keçir, onlara bənzəm
istəyir. Bu dövrdə şəxsiyyət çaşqınlığı bütün yeniyetmələrin yaşadığı təbii bir
prosesdir. Amma şəxsiyyət çaşqınlığından çıxa bilməyən və mənfi xarakterə yiyələnən
yeniyetmə narkotik maddə istifadəsi kimi ağır problemlə üzləşə bilir. Lamiyə Qarayeva çıxışında həmçinin vurğuladı ki, 44 günlük Vətən
Müharibəsində biz 30 il ərzində düşmən tapdağı altında qalan torpaqlarımızı
sağlam ruhda, milli mənəvi dəyərlərə malik gənclərimizin sayəsində işğaldan
azad etdik. Çalışmalıyıq ki, bundan sonrakı nəsillərdə vətənpərvər ruhda
yetişsin, xalqına, vətəninə layiqli övlad olmaq amalı uğrunda tərbiyə
olunsunlar. Xəlil Vəliyev çıxışında bildirdi ki, yeniyetmə və gənclərin zərərli vərdişlərə
meyil göstərmələrinin qarşısını almaq üçün valideyn və müəllimlər onların asudə
vaxtlarının səmərəli təşkilinə ciddi diqqət yetirməli, uşaqların elmə, idmana və
təhsilə yönləndirilməsi istiqamətində davamlı iş aparmalıdırlar. Daha sonra Tural Xəlilov narkomaniyaya qarşı hüquq-mühafizə, o
cümlədən polis orqanlarının apardığı qətiyyətli mübarizə tədbirləri barədə məruzə ilə çıxışında qeyd etdi ki, Azərbaycan Respublikasının Prezidenti İlham Əliyev tərəfindən
“Narkotik vasitələrin, psixotrop maddələrin və onların prekursorlarının
qanunsuz dövriyyəsinə və narkomanlığa qarşı mübarizəyə dair Dövlət
Proqramı"nın təsdiq edilməsi bu dəhşətli bəlaya qarşı mübarizə sahəsində
ölkə rəhbərliyi səviyyəsində atılmış növbəti mühüm addım olub. Daxili İşlər
Nazirliyinin və yerli polis orqanlarının əməkdaşları narkotik vasitələrin
qanunsuz dövriyyəsinə qarşı ən qəti tədbirlər görməklə yanaşı, həm də
azyaşlılarla, gənclərlə vaxtaşırı maarifləndirici görüşlər keçirirlər. Tədbirdə narkomaniyanın fəsadlarından bəhs edən video-çarx göstərilmişdir.